ရန်ကုန်မြို့ပေါ် မဲဆန္ဒနယ်များတွင် အမျိုးသား ဒီမိုကရေစီ အဖွဲ့ချုပ် အနိုင်ရနိုင်မလား

နောက်ဆုံးရရှိတဲ့ သတင်းများအရ ရန်ကုန်တိုင်းအတွင်းရှိ အချို့မြို့နယ်များတွင် အမျိုးသား ဒီမိုကရေစီ အဖွဲ့ချုပ်အနေနဲ့ အနိုင်ရဖို့ မရေမရာ ဖြစ်နေကြောင်း စောင့်ကြည့် လေ့လာသူများက သုံးသပ်ကြပါတယ်။ အထူးသဖြင့် မရမ်းကုန်းမြို့နယ် မဲဆန္ဒနယ်တွင် အမျိုးသား ဒီမိုကရေစီ အဖွဲ့ချုပ် အနေဖြင့် အားနည်းနိုင်ကြောင်း၊ မင်္ဂလာတောင်ညွန့်မြို့နယ်မှာကလည်း ၀င်ရောက် အရွေးခံသူများတဲ့အတွက် မဲ ပြန့်သွားနိုင်ကြောင်း ရွေးကောက်ပွဲ အခြေအနေ စောင့်ကြည့်နေသူများက ယနေ့မြန်မာကို ပြောပြပါတယ်။ သို့သော်လည်း ဒဂုံမြို့သစ် (ဆိပ်ကမ်း) နဲ့ ကော့မှူးမြို့နယ်တို့တွင် အမျိုးသား ဒီမိုကရေစီ အဖွဲ့ချုပ် အခြေအနေ ကောင်းကြောင်း၊ သုံးခွနဲ့ လှည်းကူးမြို့နယ်များက အခြေအနေများကို မသိရသေးသော်လည်း အမျိုးသား ဒီမိုကရေစီ အဖွဲ့ချုပ် ကိုယ်စားလှယ်လောင်း ရွေးချယ်ခံရနိုင်ကြောင်း ၂၀၁၂ ဧပြီ ၁ ရက်နေ့ ညနေပိုင်း ခန့်မှန်းသတင်းများအရ သိရပါတယ်။ ၂၀၁၂ ရွေးကောက်ပွဲကို ယခင် ၀န်ကြီးချုပ်နဲ့ ထောက်လှမ်းရေး အကြီးအကဲဟောင်း ဦးခင်ညွန့်နဲ့ မိသားစု မဲပေးခဲ့ရာ ဦးခင်ညွန့်နဲ့ သူ့ရဲ့သားကတော့ အမျိုးသား ဒီမိုကရေစီ အဖွဲ့ချုပ်ကို မဲပေးခဲ့ကြောင်း သိရပါတယ်။ ထို့အပြင် ရုပ်ရှင်မင်းသား ဦးကျော်သူနဲ့ ဇနီး ဒေါ်ရွှေဇီးကွက်တို့လည်း အမျိုးသား ဒီမိုကရေစီ အဖွဲ့ချုပ်ကို မဲပေးခဲ့ကြပါတယ်။ ထိုကဲ့သို့ အထင်ကရ လူသိများတဲ့ ပုဂ္ဂိုလ်များအနေနဲ့ လူသိရှင်ကြား ထုတ်ဖော်ကာ အမျိုးသား ဒီမိုကရေစီ အဖွဲ့ချုပ်ကို မဲပေးခဲ့ကြတဲ့ မရမ်းကုန်း မဲဆန္ဒနယ်ဟာ ကာကွယ်ရေးပစ္စည်းစက်ရုံများ၊ တပ်မတော်သား မိသားစုများ နေထိုင်တဲ့ ရပ်ကွက်များ ပါဝင် ဖွဲ့စည်းထားတဲ့ မဲဆန္ဒနယ်များ ဖြစ်ပါတယ်။ စစ်တပ်နယ်အတွင်းကို အမျိုးသားး ဒီမိုကရေစီ အဖွဲ့ချုပ်အနေနဲ့ ၀င်ရောက် မဲဆွယ်ဖို့ ခက်ခဲသော်လည်း သက်ဆိုင်ရာ တပ်ရင်းတပ်ဖွဲ့ အကြီးအကဲများအနေနဲ့ အရာရှိ အရာခံ အကြပ်တပ်သားများနဲ့ မိသားစုများရဲ့ ဆန္ဒမဲများကို လွယ်လင့်တကူ ရယူနိုင်တယ်ဆိုတာ အများ သိနေကြပြီး ဖြစ်ပါတယ်။ ဒါ့ကြောင့်မို့ တပ်မိသားစုများရဲ့ မဲများကို ကြိုတင်မဲ အနေနဲ့ ရယူကာ ပြည်ထောင်စု ကြံ့ခိုင် ဖွံ့ဖြိုးရေး ကိုယ်စားလှယ်လောင်းကို မဲပေးနိုင်တဲ့ အခြေအနေတွင် ရှိနေခြင်း၊ မဲပေးသူ အရေအတွက် နည်းပါးနေခြင်းများကြောင့် လက်ရှိသတင်းများအရ အမျိုးသား ဒီမိုကရေစီ အဖွဲ့ချုပ်ရဲ့ မရမ်းကုန်းမြို့နယ် ကိုယ်စားလှယ်လောင်းအနေနဲ့ ရွေးချယ်ခံရနိုင်ဖို့ အခွင့်အလမ်းနည်းပါးနေတယ်လို့ သုံးသပ်ကြပါတယ်။ သို့သော်လည်း ကြိုတင်မဲများဟာ ပြည်ထောင်စု ကြံ့ခိုင် ဖွံ့ဖြိုးရေး ပါတီ (ကြံ့ဖွတ်ပါတီ) ကိုယ်စားလှယ်လောင်းများကိုသာ ပေးထားတဲ့ မဲ မဟုတ်ဘဲ အမျိုးသား ဒီမိုကရေစီ အဖွဲ့ချုပ်ကို ပေးထားတဲ့ မဲများ ဖြစ်ပါက အခြေအနေ ပြောင်းလဲသွားနိုင်ခြေ ရှိပါတယ်။ ကနဦးသတင်းများအရ မင်္ဂလာတောင်ညွန့်မြို့နယ်က မဲရုံအချို့တွင် ကြံ့ဖွတ်ပါတီအတွက် မဲထည့်ထားသူ ဦးရေ များပြားကြောင်း သိရှိရပါတယ်။ မင်္ဂလာတောင်ညွန့်မြို့နယ်က ရပ်ကွက်ပေါင်း ၂၀ တွင် မဲရုံပေါင်း ၆၈ ရုံ ရှိပြီး မဲပေးရမယ့်သူ တသိန်း နှစ်ထောင် ရှိကာ ပါတီ ငါးပါတီက ကိုယ်စားလှယ်လောင်းများ ၀င်ရောက် ယှဉ်ပြိုင်ခဲ့ကြပါတယ်။ တကယ်လို့ မင်္ဂလာတောင်ညွန့်မြို့နယ်တွင် အမျိုးသား ဒီမိုကရေစီ အဖွဲ့ချုပ် အခြေအနေ မကောင်းနိုင်ပါက ကြံ့ဇွတ်ပါတီကို ပြိုင်ဘက် ပါတီ လေးပါတီက ၀ိုင်းပြိုင်သလို ဖြစ်တဲ့အတွက် မဲများ ပြန့်သွားတာ ဖြစ်နိုင်ကြောင်း၊ ထို မဲဆန္ဒနယ်က ပါဝင် ယှဉ်ပြိုင်တဲ့ ဦးသုဝေဟာလည်း လူသိများသူ ဖြစ်ကြောင်း၊ အကြို မဲဆွယ်မှု အနေအထားအရ အမျိုးသား ဒီမိုကရေစီ အဖွဲ့ချုပ်ကို တခဲနက် ထောက်ခံအားပေးထားတာကို တွေ့ရတဲ့အတွက် အဆုံးသတ် အဖြေကတော့ အတိအကျ မပြောနိုင်သေးကြောင်း လေ့လာသူများက ပြောပါတယ်။ ရန်ကုန်တိုင်းက လစ်လပ် မဲဆန္ဒနယ်များအနက် ဒဂုံမြို့သစ် (ဆိပ်ကမ်း) မြို့နယ်နဲ့ ကော့မှူး မဲဆန္ဒနယ်တွေမှာတော့ အမျိုးသား ဒီမိုကရေစီ အဖွဲ့ချုပ် အနိုင်ရလိမ့်မယ်လို့ လေ့လာသူများက ခန့်မှန်းပါတယ်။ ဒဂုံမြို့သစ် (ဆိပ်ကမ်း) မြို့နယ်တွင် ကျင်းပခဲ့တဲ့ အမျိုးသား ဒီမိုကရေစီ အဖွဲ့ချုပ် မဲဆွယ်ပွဲတွင် ဒေါ်အောင်ဆန်းစုကြည် တက်ရောက် ဟောပြောခဲ့ရာ ရန်ကုန်တိုင်းအတွင်း ကျင်းပခဲ့တဲ့ ဒေါ်အောင်ဆန်းစုကြည်ရဲ့ လူထုတွေ့ဆုံပွဲများအနက် လူဦးရေ အများဆုံးပွဲတခု ဖြစ်ခဲ့ပါတယ်။ အမျိုးသား ဒီမိုကရေစီ အဖွဲ့ချုပ်အနေနဲ့ ဒဂုံမြို့သစ် (ဆိပ်ကမ်း) မြို့နယ်နေ ပြည်သူများရဲ့ ထောက်ခံမှုကို အံ့မခန်းဘွယ်ရာ ရရှိခဲ့ပြီး ဖြစ်တဲ့အတွက် အမျိုးသား ဒီမိုကရေစီ အဖွဲ့ချုပ်အနေနဲ့ ဒဂုံမြို့သစ် (ဆိပ်ကမ်း) မြို့နယ်မှာ အနိုင်ရနိုင်တယ်လို့ ပြောကြပါတယ်။ ကော့မှူးမြို့နယ်ဟာ ဒေါ်အောင်ဆန်းစုကြည် ၀င်ရောက် ယှဉ်ပြိုင်တဲ့ မဲဆန္ဒနယ် ဖြစ်ကာ ရွေးကောက်ပွဲတွင် မသမာမှု ရှိ၊ မရှိ ပြည်ထောင်စု ရွေးကောက်ပွဲ ကော်မရှင် ဥက္ကဋ္ဌကိုယ်တိုင် ကွင်းဆင်း ကြီးကြပ်တဲ့အတွက် ဒေါ်အောင်ဆန်းစုကြည် အနိုင်ရနိုင်တယ်လို့ အများက ထင်ကြေးပေးကြပါတယ်။ ကော့မှူးမဲဆန္ဒနယ်က သတင်းများနဲ့ ပတ်သက်လို့တော့ ကော့မှူးမြို့နယ် ၀ါးသင်္ခကျေးရွာရှိ တပ်နယ် မဲဆန္ဒနယ်တခုမှာ မဲစာရင်း ပိတ်ကြပြီး မဲ ရေတွက်ကြရာ အမျိုးသား ဒီမိုကရေစီ အဖွဲ့ချုပ်က မဲ အများဆုံး ရရှိခဲ့ကြောင်း၊ မဲ ရေတွက်ကြကာ သက်ဆိုင်သူများ လက်မှတ်ရေးထိုးခဲ့ကြပြီးနောက် မဲရုံမှူးအဖြစ် တာဝန်ယူထားတဲ့ ဒေသဆိုင်ရာ တပ်မှူးကတော်က မဲပုံးကို ယူသွားခဲ့ကြောင်း သိရပါတယ်။ ယင်း အဖြစ်အပျက်နဲ့ ပတ်သက်ပြီး ထိုဒေသရှိ အမျိုးသား ဒီမိုကရေစီ အဖွဲ့ချုပ် ရွေးကောက်ပွဲ တာဝန်ခံက “အဲဒါ လေကာတပ်က ဗျ။ တပ်အမှတ်က ၂၀၁၈။ အဖြစ်အပျက်က ဒီလို ခင်ဗျ။ အဲဒီတပ်မှာ မဲက စောစောစီးစီး ပြီးတယ်။ ပြီးတော့ မဲရုံမှူးက မဲရုံကိုယ်စားလှယ်တွေကို ခေါ်တယ်။ မဲကို အားလုံးချပြီး ရေတယ်။ ရေလည်း ရေပြီးရော မဲရုံကိုယ်စားလှယ်တွေကို အားလုံး လက်မှတ်ထိုးပါ တဲ့။ လက်မှတ်ထိုးလိုက်ရတယ်။ လက်မှတ်ထိုးလည်း ပြီးရော မဲပုံးကို သူ ယူသွားတယ် ခင်ဗျ။ ယူသွားတဲ့သူက အဲဒီတပ်ရဲ့ တပ်ရင်းမှူးကတော်လည်း ဖြစ်တယ်။ အဲဒီမဲရုံက မဲရုံမှူးလည်း ဖြစ်တယ် ခင်ဗျ“ လို့ ပြောပါတယ်။ ဘာ့ကြောင့် အဲဒီလို ယူသွားတာလဲဆိုတာတော့ မသိကြရသေးသလို ဘယ်ရောက်နေသလဲဆိုတာကိုလည်း မသိကြသေးကြောင်း၊ ယူသွားတာကတော့ တိတိကျကျ သတင်းရကြောင်း အမျိုးသား ဒီမိုကရေစီ အဖွဲ့ချုပ် ဒေသဆိုင်ရာ တာဝန်ခံက ယနေ့မြန်မာကို ပြောပါတယ်။ အခုအချိန်မှာ ကော့မှူးမြို့နယ်ကို ညအိပ် သွားရောက်ခဲ့တဲ့ ဒေါ်အောင်ဆန်းစုကြည် ရန်ကုန် နေအိမ်ကို ပြန်လည် ရောက်ရှိနေပြီ ဖြစ်ကြောင်း၊ မဲ မသမာမှုများကြောင့် ဒေါသအနည်းငယ် ထွက်နေကြောင်း သိရပါတယ်။ နောက်ဆုံးသတင်းအရ ကော့မှူးမြို့နယ် ရေကျော်ကျေးရွာအုပ်စု၏ မဲရုံအမှတ် (၁) ဖြစ်သော ချောင်းဝကျေးရွာတွင် မဲစာရင်းအပြီးသတ် ရွေးတွက်ပြီးချိန်တွင် အမျိုးသား ဒီမိုကရေစီ အဖွဲ့ချုပ် - ၃၁၄ မဲ၊ ကြံ့ဖွတ်ပါတီ - ၁၆ မဲ၊ ညီညွတ်ရေးနှင့်ငြိမ်းရေးပါတီ - ၁မဲ၊ ပယ်မဲ ၈ မဲ ရှိကြောင်း သိရပါတယ်။ ရေကျော်ကျေးရွာအုပ်စုတွင် မဲရုံငါးရုံ ရှိတဲ့အနက် မဲရုံ (၁) ဖြစ်တဲ့ ချောင်းဝကျေးရွာနဲ့ မဲရုံ (၅) ဖြစ်တဲ့ နောင်လုံကျေးရွာ နှစ်ရွာစလုံး၌ အမျိုးသား ဒီမိုကရေစီ အဖွဲ့ချုပ် က မဲအပြတ်အသတ်ဖြင့် အနိုင်ရရှိနေပါတယ်။ ရန်ကုန်တိုင်း သုံးခွနဲ့ လှည်းကူးမြို့နယ်က သတင်းများကတော့ အခု သတင်းရေးတဲ့အချိန်အထိ ရရှိခြင်း မရှိသေးပေမယ့် အမျိုးသား ဒီမိုကရေစီ အဖွဲ့ချုပ် နိုင်ခြေ ရှိတယ်လို့ ဆိုကြပါတယ်။(အခုသတင်းကို အယ်ဒီတာ မြင့်လှိုင်က ဒီမိုဝေယံနဲ့ ဒီမိုကောင်းကင်တို့ ပေးပို့တဲ့ သတင်းများနဲ့ ဆက်စပ်ကာ ရေးသားထားပါတယ်။)

ဒီမိုကရက်တစ်ပါတီ (မြန်မာ) က ဦးသုဝေအား သတင်းသမားများက မေးမြန်းစဉ်

                http://burmatoday.net/news.php?news_ID=203