Kuala Lumpur Time
၈၈ မျိုးဆက်ကျောင်းသားများ အဖွဲ့က ကိုမာကီနဲ့ သူ့ဇနီး မစုစုနွေးတို့ကို ဖေ့စ်ဘုတ်လူမှုကွန်ရက်တွေက တိုက်ခိုက်နေတာတွေကို ယနေ့တော့ ကိုမာကီက သူ့ရဲ့ ဖေ့စ်ဘုတ်ကတဆင့် သူ့ဘ၀ သူ့အကြောင်းကို အခုလို တုံ့ပြန်ဖြေရှင်းထားပါတယ်။
မစုစုနွေးနဲ့ ကိုမာကီတို့ ဇနီးမောင်နှံ၊ ဓာတ်ပုံ ကိုမာကီ
ကျနော် ကိုမာကီ ဗုဒ္ဓဘာသာလား၊ မွတ်ဆလင်လား၊ ဗမာလား၊ ကုလားလား ...
စာမျက်နှာတွေမှာ ကျနော်နဲ့ ကျနော့်ရဲ့အမျိုးသမီး မစုစုနွေးတို့ကို မကြာခနတိုက်ခဲ့တာတွေရှိပါတယ်။ အထူးသဖြင့်တော့ ကျနော့်ကိုတည်ပြီး မစုစုနွေးကို တိုက်ကြပါတယ်။
ဘယ်တုန်းကမှ ကျနော်တို့တုန့်ပြန်လေ့ မရှိခဲ့ပါဘူး။ unfriend, block … စတာတွေမလုပ်ခဲ့ပါဘူး။ comment တွေကိုတောင် ရိုင်းရိုင်းစိုင်းစိုင်းတွေမဟုတ်ရင် ဖြုတ်ပစ်လေ့ မရှိပါဘူး။
အခုမှ ကိုယ့်ရဲ့စိတ်ထဲ အမှန်ရှိတဲ့ သဘောထားအမြင်တွေကို ဖော်ထုတ်ခွင့်၊ အထိုက်အလျောက် လွတ်လွတ် လပ်လပ် ရေးသားခွင့်ရှိလာစဉ်မှာ အဟန့်အတား မလုပ်ချင်လို့ပါ။
အဓိကကတော့ ကျနော်ဟာ မွတ်ဆလင်ကုလားတစ်ယောက်ဖြစ်တယ်ဆိုပြီး တိုက်ကြတာပါ။ ဘယ်ဘာသာကိုပဲ ကိုးကွယ်ကိုးကွယ်၊ ဘယ်လူမျိုးပဲ ဖြစ်ဖြစ် ဘယ်သူ့ကိုမှ ခွဲခြားဆက်ဆံလေ့မရှိတဲ့ အတွက် ကျနော်မွတ်ဆလင်ကုလားမဟုတ်ကြောင်း ဆတ်ဆတ်ထိမခံ တုန့်ပြန်စရာ မလိုဘူးလို့ပဲ ခံယူထားပါတယ်။
ပြီးတော့ မွတ်ဆလင်ကုလားဆိုပြီး တိုက်ခိုက်နေကြတဲ့အပေါ်မှာလည်း ကျနော်အားပေးအားမြှောက် မလုပ်ချင်လို့ပါ။ နောက်ထပ် အဓိကကျတဲ့ အချက်က ရခိုင်ဘက်မှာဖြစ်ပွားနေတဲ့ ပဋိပက္ခအပေါ်မှာလည်း နိုင်ငံရေးသမားတစ်ယောက်အနေနဲ့ ကျနော့်ရဲ့ခံယူချက်ရှိပြီးသားမို့ပါ။
နယ်စပ်ဖြတ်ကျော်ခိုးဝင်လာတဲ့ ကျူးကျော်သူတွေနဲ့ အစ္စလာမ်ဘာသာကိုလည်း သီးခြားစီပဲမြင်ပါတယ်။ ရခိုင်ပြည်နယ်ရဲ့ အန္တရာယ်ရှိတဲ့ ပထဝီဝင်သဘာဝ၊ ရခိုင်တိုင်းရင်းသားတို့ရဲ့ စိုးရိမ်ပူပန်မှုနဲ့အမျိုးသားရေး စိတ်၊ ဒါတွေကိုလည်း ကျနော်ရှင်းရှင်းလင်းလင်း နားလည်ထားပါတယ်။
ဒါ့ကြောင့် ကျနော်တို့ကို တိုက်ခိုက်နေတဲ့အပေါ်မှာ အထူးအထွေလည်း မခံစားရပါဘူး။ နစ်နာလှချည်ရဲ့လို့လည်း မခံစားခဲ့ရပါဘူး။
ဒါပေမယ့် အခုနောက်ပိုင်းမှာ ကျနော်တို့က တုန့်ပြန်မရှင်းတဲ့အတွက် ပုဂ္ဂိုလ်ချင်းရင်းနှီးသူ မိတ်ဆွေတွေကရော၊ လူချင်းမမြင်ဖူးကြတဲ့ မိတ်ဆွေတွေကပါ အားမလိုအားမရ ဖြစ်လာကြပါတယ်။
တချို့ဆိုရင် ထင်ယောင်ထင်မှားတွေတောင် ဖြစ်လာကြပုံရပါတယ်။
ဒါ့ကြောင့် ဘယ်တုန်းက မှ ဖြေရှင်းလိုစိတ် မရှိခဲ့တဲ့ကျနော် အခုတော့ …. ကျနော့်မာမီက စိန့်ဂျွန်း ကွန်ဗင့်ကျောင်း (ယခုလသာ၂)ထွက်ပါ။ မွန်ဗမာလူမျိုး RC ခရစ်ယန်ပါ။ ကျနော့် ဒယ်ဒီက ဗမာလူမျိုး ဗုဒ္ဓဘာသာပါ။ RC ဘာသာရဲ့ထုံးစံကို ဗုဒ္ဓဘာသာယောက်ျား ကျနော့်ဒယ်ဒီက လိုက်လျောခဲ့လို့ ကျနော် ဟာ မွေးကင်းစကတည်းက RC ခရစ်ယန်ဖြစ်ခဲ့ပါတယ်။
ခရစ်ယာန်နာမည် Mark ဆိုပြီး ရေဖြန်းခံခဲ့ရတာပါ။ Mark ဆိုတာကို ကျနော်တို့ဝန်းကျင်မှာ အခေါ်ရခက်လှတာမို့ Marky (မာကီ)ဆိုပြီး နာမည်တွင်ခဲ့ရပါတယ်။
ငယ်စဉ်ကလေးဘ၀တစ်လျှောက်လုံး Church တက်ခဲ့ရပါတယ်။ အသက်၁၈/၁၉မှာ စာပေတွေကတစ်ဆင့် လက်ဝဲအယူဆတွေ ၀င်လာပါတယ်။ (ဒယ်ဒီရော၊မာမီရောက စာဖတ်သမားတွေမို့ ကျနော့်ကိုလည်း စာဖတ် ၀ါသနာပါစေပါတယ်) အဲဒီကတစ်ဆင့် ကွန်မြူနစ်စာပေ၊အယူအဆတွေရဲ့ လွှမ်းမိုးခြင်း ခံခဲ့ရပါတယ်။
ငယ်စဉ်ကတည်းက ဗုဒ္ဓဘာသာပတ်ဝန်းကျင်၊ ဗုဒ္ဓဘာသာစာပေတွေနဲ့ နီးနီးစပ်စပ် ကြီးပြင်းခဲ့ရပေမယ့်၊ ကျနော်ကိုက ဘာသာရေးကို စိတ်မဝင်စားခဲ့ပါဘူး။
ဗုဒ္ဓတရားတော်တွေကို လေ့လာဖြစ်တဲ့အခါမှာလည်း ကြည်ညိုသဒ္ဓါစိတ်နဲ့ မဟုတ်ဘဲ၊ ငြင်းခုန်ဖို့ အချက်အလက်ရှာတဲ့အနေနဲ့ပဲ ဖတ်ရှုခဲ့တာမို့ ကျနော်ဟာ ဗုဒ္ဓဘာသာဝင်တစ်ယောက် မဖြစ်ခဲ့ပါ။
ပြီးတော့ လူငယ့်သဘာဝ ပတ်ဝန်းကျင်ကို စူးစမ်းတဲ့အခါမှာလည်း ပါးစပ်ကဘုရားဘုရား လက်က ကားယားကားယားဆိုတဲ့သူက ခပ်များများမို့ ဘာသာတရားနဲ့ ခပ်ကင်းကင်းပဲ ဖြစ်ခဲ့ပါတယ်။
အဲဒါကတော့ ကျနော့်ရဲ့ လူငယ်ဘ၀တစ်လျှောက်လုံးဆိုပါတော့။ မာမီက သူကိုယ်တိုင် လွတ်လပ်ခွင့်ကို မြတ်နိုးသူမို့ ကျနော့်အသက် ၁၈နှစ် ပြည့်တဲ့နေ့မှာ Church မတက်လိုက မတက်ဘဲနေနိုင်ခွင့်ပေးခဲ့ပါတယ်။
၁၉၉၆ ခုနှစ် ဒုတိယအကြိမ်ထောင်ကျလို့ မြစ်ကြီးနားထောင် ရောက်နေစဉ် (၁၉၉၈ခုနှစ် ကျနော့်အသက် ၃၀ကျော်) မှာ အပြောင်းအလဲ စဖြစ်ပါတယ်။
ကျနော်တို့ထောင်ထဲမှာ နေ့စဉ် ရင်ဆိုင်ကြုံတွေ့နေရ တဲ့ ပြဿနာတွေရဲ့ရိုက်ခတ်မှုကြောင့် ကျနော့် စိတ်တွေ အတော်ပူလောင်ညှိုးချုံးခဲ့ရတယ်။ ဒေါသဖြစ်လွယ်ပြီး မကြာခနပေါက်ကွဲချင်လာတယ်။ ရန်လိုလာတယ်။
ဒါနဲ့ မဖြစ်တော့ဘူးဆိုပြီး Meditation လုပ်ဖို့ကြိုးစားတယ်။ တရားထိုင်တယ်။ တစ်နာရီလုံးလုံးထိုင်တာကို တစ်မိနစ်ပြည့်အောင်မရဘူး။ အလွယ်ဆုံးလို့ ပြောလို့ရတဲ့ ဂဏကမ္မဌာန်းတောင် မှတ်လို့မရခဲ့ဘူး။
တစ် နှစ် သုံး လေး ငါး .. စသဖြင့် ရေတွက်တာပေါ့လေ။ တစ်ဆယ်ပြည့်အောင်တောင် ရေတွက်လို့ မရခဲ့ဘူး။
အဲဒီ့အချိန်မှာ ထောင်က ဖွင့်ပေးနေတဲ့ sound box ကနေ ဆရာတော်ဦးဇောတိကရဲ့တရားကို စတင်ကြားနာရတာပဲ။
အရှုပ်ထဲမှာ ရှင်းအောင်နေ တဲ့။ စ ကြားခါစက ဘယ်ဆရာတော်မှန်းတောင် မသိပါဘူး။ ကိုယ့်ကို ရည်ရွယ်ပြီး ဟောနေတယ်လို့ကို ထင်ရလောက်အောင် ထိမိလွန်းလို့ စုံစမ်းတော့မှ ဆရာတော် ဦးဇောတိကမှန်း သိရတာပါ။
အဲဒီကစပြီး ဆရာတော်ရဲ့စာအုပ်တွေကို ဆက်တိုက်ဖတ်ဖြစ်ခဲ့တယ်။ မြတ်ဗုဒ္ဓရဲ့အဆုံးအမတွေကို ယုံကြည်လက်ခံခဲ့တယ်။ တတ်နိုင်သမျှလည်း အဆုံးအမနဲ့ညီအောင် ကြိုးစားပြီး နေထိုင်ပါတယ်။
အဲဒီလောက်ကို ဗုဒ္ဓဘာသာပါလို့ သတ်မှတ်မယ်ဆိုရင်တော့ ကျနော် ဗုဒ္ဓဘာသာပါပေါ့။
ဒါပေမယ့် ကျနော်ကတော့ ကိုယ့်ကိုကိုယ် အပြည့်အ၀ မကျင့်ကြံ၊ မနေထိုင်နိုင်သေးတဲ့ အဆုံးအမတွေ ရှိနေသေးတာမို့ ကိုယ့်ကိုကိုယ် ဗုဒ္ဓဘာသာပါလို့ ပြောရမှာ မြတ်ဗုဒ္ဓကို အားနာနေမိပါတယ် ... ။
လူ့အခွင့်အရေးတက်ကြွလှုပ်ရှားတဲ့ မစုစုနွေးရဲ့ ခင်ပွန်း ကိုမာကီရဲ့ တုံ့ပြန်ဖြေရှင်းမှုကို ကိုမာကီ ရဲ့ ဖေ့စ်ဘုတ် စာမျက်နှာက ကူးယူဖော်ပြပေးလိုက်တာပါ။
0 comments:
Post a Comment