ဘယ်နေရာမှာထားမလဲ

တပ်မတော်ဟာ နိုင်ငံတစ်နိုင်ငံမှာ မရှိမဖြစ်လိုအပ်တဲ့ အဖွဲ့အစည်းတစ်ခုဖြစ်ပါတယ်။

စစ်တပ်လို့ပဲသုံးသုံး၊ တပ်မတော်လို့ပဲသုံးသုံး၊ ဘယ်လိုပဲသုံးနှုန်းပါစေ။ အဓိက ကတော့ နိုင်ငံကာကွယ်ရေးနဲ့ လုံခြုံရေးမှာ တန်ဖိုးအရှိဆုံးအဖွဲ့အစည်းတစ်ခုဖြစ်ပါတယ်။ ထို့အတူနိုင်ငံဂုဏ်ကိုလည်းဆောင်ပါတယ်။

တစ်ခါတစ်ရံမှာတော့ တပ်ဟာ နိုင်ငံတစ်နိုင်ငံကြီးပွားတိုးတက်ဘို့ အတွက်အဟန့်အတားလဲ ဖြစ်နိုင်ပါတယ်။ဘယ်လိုအချိန်တွေမှာ တန်ဖိုးရှိသလဲ၊ ဘယ်လိုအချိန်တွေမှာ အဟန့်အတားဖြစ်စေနိုင်သလဲ။ပုဂ္ဂိုလ်ရေးအသုံးချမှု၊ မူလတာဝန်နဲ့ နိုင်ငံအတွက် လိုအပ်ချက်တွေအပေါ်မှာ အခြေခံပါလိမ့်မယ်။ ဒါကိုလည်း ကမ္ဘာအရေး မြန်မာ့အရေးတွေမှာ ထင်ရှားစွာမြင်တွေ့နိုင်ပါတယ်။

စစ်အင်အားကြီးမားတဲ့ နိုင်ငံတွေဟာ ကမ္ဘာပေါ်မှာ ၀ံ့ကြွားနိုင်ခဲ့ကြတယ်။ ၀ံ့ကြွားလျှက်လဲရှိကြပါတယ်။ ဒီမိုကရေစီနိုင်ငံတွေမှာပဲဖြစ်ဖြစ် ကွန်မြူနစ်နိုင်ငံတွေမှာပဲဖြစ်ဖြစ်၊ စစ်အင်အားဟာ နိုင်ငံဂုဏ်ကိုဆောင်ပါတယ်။ နိုင်ငံအတွက်လည်း လုံခြုံပါတယ်။

သာမန်အားဖြင့် ဆိုလျှင်တော့ တပ်ဟာ အရောင်အသွေးမရှိပါဘူး။ နိုင်ငံရေးမှာ ပါဝင်စွက်ဖက်လေ့မရှိကြပါဘူး။ ဒါပေမဲ့ နိုင်ငံလုံခြုံရေးနဲ့ အရေးပေါ်အခြေနေတွေမှာဆိုလျှင်တော့ တစ်နည်းမဟုတ်တစ်နည်းပါဝင် ပတ်သက်မှု ရှိတတ်ကြပါတယ်။ဒီအပေါ်မှာ ရှုမြင်ပုံခြင်း မတူကြတဲ့အတွက် အကောင်းအဆိုး အမျိုးမျိုးအသံတွေထွက်လာတတ်ပါတယ်။ အသံထွက်လာပြီးဆိုကတည်းက တပ်ရဲ့ဂုဏ်၊ ပြည်သူလူထုရဲ့လေးစားကြည်ညိုစိတ်၊ ချစ်ခင်စိတ်တွေ ကျဆင်းတတ်ပါတယ်။

တစ်ဘက်က ကြည့်လျှင်သူရဲကောင်း၊ တစ်ဘက်ကကြည့်လျှင်လူကြမ်းအဖြစ် ရှုမြင်ခံရမှာပါပဲ။  ဘက်ဆိုတဲ့ သဘောတရားပေါ်မှာ အခြေခံလို့ပါ။ တပ်အတွက် နစ်နာသလို နိုင်ငံအတွက်လည်း နစ်နာလှပါတယ်။

မြန်မာနိုင်ငံမှာ မြန်မာ့တပ်မတော်ရဲ့ အခန်းကဏ္ဍဟာ အင်မတန်မှ အရေးကြီးပါတယ်။ ရှိသင့်ရိုထိုက်တဲ့နေရာမှာထားပေးဖို့လဲလိုပါလိမ့်မယ်။အမျိုးသားခေါင်းဆောင်ကြီးဗိုလ်ချုပ်အောင်ဆန်းမွေးဖွားပေးလိုက်တဲ့ မြန်မာ့တပ်မတော်ဟာ သမိုင်းပေးတာဝန်ကိုထိုက်တန်စွာ ထမ်းဆောင်ခဲ့တယ်ဆိုတာ အသိအမှတ်ပြုရမှာဖြစ်ပါတယ်။

ဒီအဆိုအပေါ်မှာ အငြင်းပွားစရာရှိပါလိမ့်မည်။ ငြင်းလည်းငြင်းနေကြတာပါပဲ။ အတိတ်ကို ပြန်ကောက်ပြီးပြောနေကြမယ်ဆိုလျှင် ရန်ဖြစ်ရုံး ငြင်းရုံပဲရှိပါလိမ့်မည်။ငြင်းနေကြမယ်၊ ပုပ်ခတ်နေကြမယ်ဆိုတာထက်စာရင် အလုပ်ဖြစ်အောင် စဉ်းစားကြမယ်။ ဖန်တီးကြမယ်ဆိုရင် အင်မတန်မှ လှပတန်ဖိုးရှိပါလိမ့်မယ်။ လေနဲ့ပြောရတာ အင်မတန်လွယ်ပါတယ်။
ခက်တာက လေနောက်လိုက်အကောင်အထည်ဖေါ်ပေးရတာပဲ။ စိတ်ကူးယဉ်ရုံ အတွေးကောင်းရုံ၊ လက်တွေ့မဆန်တဲ့ သီအိုရီတွေခင်းပြနေရုံးနဲ့တော့ အလုပ်မဖြစ်ဘူးထင်ပါတယ်။


တပ်နဲ့ပတ်သက်ပြီး ၂၀၀၈ ခုနှစ်ဖွဲ့စည်းပုံအခြေခံဥပဒေမှာ အတိအလင်းဖေါ်ပြထားပါတယ်။ ရှိသင့်တဲ့နေရာ ၊ ရှိရမယ်နေရာလည်း ပါပါတယ်။ ဒီအပေါ်မှာ လက်ခံနိုင်တဲ့ သူတွေရှိသလို လက်မခံတဲ့သူတွေလည်းရှိကြပါတယ်။အခုထက်ထိလဲ ငြင်းကြ၊ ဝေဖန်ကြ၊ပြောကြ၊ ဆိုကြပဲရှိပါသေးတယ်။ ကောင်းတဲ့ အလားအလားမဟုတ်ဘူးလို့ထင်ပါတယ်။လက်ရှိကျင့်သုံးနေတဲ့ ဖွဲ့စည်းပုံမှာ တပ်ရဲ့အခန်းကဏ္ဍာကိုသမိုင်းကြောင်းအရ အခြေခံပြီး စဉ်းစားခဲ့သလို၊ Geopolitics အရလည်း အချိန်ယူလေ့လာစဉ်းစားပြီးမှ ဆွေးနွေးခဲ့တယ်။ ရေးသားခဲ့တယ်လို့သိထားပါတယ်။

ဒီအပေါ်မှာ မငြင်းလိုပါ။ မဝေဖန်လိုပါ။ ကောင်းသလား။ မကောင်းဘူးလား။ မှန်သလား၊ မမှန်ဘူးလားဆိုတာတော့ ကိုင်တွယ်ကျင့်သုံးကြသူများနဲ့ အချိန်က စကားပြောပါလိမ့်မယ်။

သေချာတာကတော့ ဖွဲ့စည်းပုံလည်းရှိနေပြီ။ နေရာလည်းသတ်မှတ်ထားပြီးသား ။ ဒါကိုဘယ်လိုပြင်ကြမှာလဲ ။ ဘယ်လိုဖြစ်ချင်လို့လဲ ။ ဘယ်လောက်ထိဖြစ်နိုင်မယ်လို့ မှန်းထားသလဲ။ကိုယ်အတွေးအခေါ်၊ ကိုယ်အယူအဆအရမှန်တယ်ထင်။ အဲဒီအပေါ်မှာ အခြေခံ။ ပြည်သူလူထုကိုစည်းရုံး။ ပြည်သူ့အားနဲ့ တပ်ကိုကိုယ်ရောက်စေချင်တဲ့နေရာကို အတင်းပို့မယ်ဆိုရင်အဆိုးသံသရာထဲမှာပဲ လည်နေပါလိမ့်မယ်။

တပ်သည် ပြည်ခိုင်ဖြိုးရဲ့ လက်ရုံးမဖြစ်သင့်သလို ၊ NLDရဲ့ ရန်သူလဲမဖြစ်သင့်ပါ။
ထို့အတူ NLDရဲ့ လက်ရုံးမဖြစ်သင့် သလို့ပြည်ခိုင်ဖြိုးရဲ့ ရန်သူလဲမဖြစ်သင့်ပါ။
ဒီထက်ပိုရရင်တော့ တစ်ဦး၊ တစ်ဖွဲ့၊ တစ်ပါတီရဲ့လက်ရုံးမဖြစ်သင့်ပါ။ ထို့အတူရန်သူလဲ မဖြစ်သင့်ပါ။
တပ်သည်ဖွဲ့စည်းပုံအခြေခံဥပဒေကို စောင့်ရှောက်မယ်လို့အတိအလင်းကြေညာပြီးသား။ ကိုယ်တိုင်ကြေညာပြီးသားဖြစ်တဲ့အတွက် တပ်ကိုဖွဲ့စည်းပုံအခြေခံဥပဒေထဲမှာ မြုပ်သွားအောင်၊ မြုပ်နှံနိုင်အောင် ဖန်တီးပေးဖို့လိုလိမ့်မယ်။

ဖွဲ့စည်းပုံထဲမှာ နေတတ်အောင်၊ နေသွားနိုင်အောင် ၀ိုင်းဝန်းပံ့ပိုးပေးဖို့လိုပါလိမ်မယ် ။ ဖွဲ့စည်းပုံမပျက်သမျှ တပ်သည်နိုင်ငံရေးဧရိယာမှာဝင်ပါစရာမရှိပါ။

ဖွဲ့စည်းပုံသာပျက်သွားခဲ့ရင် နိုင်ငံတော်ကာကွယ်ရေးတာဝန်၊ အမျိုးသားရေးတာဝန်နဲ့ Geopolitics အပေါ်မှာ အခြေခံပြီး ဘက်တစ်ဖက်ကိုရောက်သွားပါလိမ့်မည်။ သို့မဟုတ် ကိုယ်တိုင်ပင်ဘက်တစ်ခုဖြစ်သွားနိုင်ပါလိမ့်မယ်။
http://www.thithtoolwin.com