ရေနွေးပူအလောင်းခံရသူနဲ့ အင်တာဗျူး

ကလေးကို နှိပ်စက်ခဲ့တယ် ဆိုတဲ့ အလုပ်ရှင် ၂ ဦး

ကရင်မိန်းကလေး တယောက် ထိုင်းနိုင်ငံ မြောက်ပိုင်း ကန်ဖယ်ဖက်မြို့နယ်မှာ  သူ့အလုပ်ရှင် ထိုင်းလင်မယားရဲ့ လူမဆန်တဲ့ နည်းတွေနဲ့ ညှဉ်းပန်း နှိပ်စက်ခံခဲ့ရပါတယ်။

ထိုင်းအလုပ်ရှင်တွေဆီမှာ အသက် ၇ နှစ်အရွယ်ကနေ အလုပ်လုပ်ပေးခဲ့တာ အခု အသက် ၁၂ နှစ်အထိပါပဲ တဲ့။ 

ကတ်ကျေးနဲ့ကိုက်၊ ရေနွေးပူနဲ့လောင်းခံရတဲ့ ဒီကလေးကို ကန်ဖယ်ဖက်မြို့နယ်မှာရှိတဲ့ မိခင်နဲ့ ကလေး စောင့်ရှောက်ရေး ဂေဟာမှာ ထိုင်းအာဏာပိုင်တွေ စောင့်ရှောက်ထားပါတယ်။ 

သူရဲ့ ဒဏ်ရာတွေကိုတော့ ထိုင်းအစိုးရက အကုန်ကျခံ ကုသပေးမှာပါ တဲ့။

သူ့ကို နှိပ်စက်တယ် ဆိုတဲ့ အလုပ်ရှင်လင်မယားကို ဖေဖော်ဝါရီလ ၆ ရက်နေ့က ဝရမ်းထုတ်ပြီး ဖမ်းခဲ့ပါသေးတယ်၊ 

ကလေးငယ်ကို ညှဉ်းပန်း နှိပ်စက်မှုတွေ အပါအ၀င် အမှု ၇ မှုနဲ့ တရားစွဲထားပါတယ်။ 

သူတို့က နှိပ်စက်တယ် ဆိုတဲ့ စွပ်စွဲချက်တွေကို ငြင်းပယ်ပါတယ်။

နောက်ပိုင်းမှာ သူတို့ကို ဘတ်ငွေ ၇ သိန်း အာမခံနဲ့ ထိုင်း အာဏာပိုင်တွေက လွှတ်ပေးခဲ့ပါတယ်။

 ယခုလ ၁၈ ရက်နေ့မှာ ရုံးချိန်းကို သူတို့၂ယောက် ရောက်မလာတော့ ထိုင်းအာဏာပိုင်တွေက ဖမ်းမိန့်ထုတ်ခဲ့တာပါ။ သူတို့ကို  ဘတ်ငွေ တသိန်း ဆုကြေးငွေ ထုတ် ထားပါသေးတယ်။ 

သတင်းတပုဒ်မှာတော့ သူတို့ ၂ ယောက် ကမ္ဘောဒီးယားနိုင်ငံဘက် ထွက်ပြေးသွားတယ်လို့ သိရကြောင်း သူတို့မြို့က ရဲဗိုလ်မှူး Akkarasorn Srisupat ဆိုသူက ပြောကြောင်း ရေးသားထားပါတယ်။

ဒီကလေး ဘယ်လို ညှဉ်းပန်း နှိပ်စက်ခံခဲ့ရသလဲဆိုတာတွေကို  ထိုင်း ရုပ်သံ အမှတ်  ၃  လိုင်းက အင်တာဗျုး လုပ်ပြီးတော့ ထုတ်လွှင့်ပြသသွားခဲ့ပါတယ်။

ပထမဆုံး ကရင်မိန်းကလေးရဲ့ ပြောဆိုချက်နဲ့ အစပြုပါတယ် - 

“ခွေးလှောင်အိမ်ထဲမှာ ထည့်ပြီးတော့ ရေနွေးပူနဲ့ လောင်းပါတယ်”

ဘယ်နှစ်ကြိမ် လောင်းလဲ။

“တခါပါပဲ”

တကိုယ်လုံး လောင်းတယ်ဆိုတော့ အနာတွေကို သမီး ဘယ်လိုလုပ်လဲ။

“သူတို့ လှောင်အိမ်ထဲမှာပဲ တညလုံး သမီးကို မိုးလင်းတဲ့ အထိထားတယ်”

မိုးလင်းတဲ့ အထိထားပြီးတော့ ဘယ်လိုဆက်လုပ်လဲ။

“လှောင်အိမ်ထဲကနေ ထုတ်ပေးပြီးတော့ ဘာမှ မလုပ်ပေးဘူး”

နောက်တော့ ဘယ်လို ဆေးကုသတာလဲ။

“ဆားရည်တွေကို သုံးပြီးတော့ ကုတယ်”

 

ရေနွေးပူနဲ့ လောင်းတဲ့အပြင် သမီးကို ဘာလုပ်တာ တွေ ရှိသေးလဲ။

“ရိုက်သေးတယ်” 

ဘာနဲ့ ရိုက်လဲ။

“တံမျက်စည်းနဲ့ ရိုက်တယ်”

နေ့တိုင်း ရိုက်တာလား။

“နေ့တိုင်း မရိုက်ဘူး တခါတလေ ရိုက်တယ်”

ခေါင်းမှာ ရှိတဲ့ ဒဏ်ရာကရော ဘယ်လိုလုပ်လဲ။

“အုတ်နံရံနဲ့ ဆောင့်တာ”

နောက်ပြီးတော့ တခြား ဖိနပ်နဲ့ ဘာနဲ့ ရိုက်တာ ရှိလား။

“ရှိတယ် မျက်နှာကို ဖိနပ်နဲ့ ရိုက်တယ်”

ဘာကြောင့် နားရွက် ပြတ်နေတာလဲ။

“ကတ်ကြေးနဲ့ ညှပ် ထားတာ”

အခုလို သမီးကို ကူညီတဲ့လူတွေ ရှိနေပြီးဆိုတော့ ဘယ်လိုခံစားရလဲ။

“၀မ်းသာပါတယ်”

အင်တာဗျူးရုပ်သံ 

ဒီအမှုနဲ့ ပတ်သက်ပြီး  မြန်မာအစိုးရအလုပ်သမားဌာန ညွန်မှူးတယောက်ဖြစ်တဲ့ ဦးနိုင်ထွန်းကတော့ 

“မြန်မာတွေနဲ့ ဖြစ်တဲ့ ကိစ္စမှန်သမျှမှာ ထိုင်းတွေက သွေးအေးအောင် လုပ်ပြီးတော့ မေ့မေ့ ပျောက်ပျောက် ဖြစ်အောင် လုပ်တာမျိုး တွေရှိတယ်”

လို့ ဧရာဝတီသတင်းဌာနကို မကြာသေးခင် ရက်ပိုင်းက ပြောပါတယ်။

ကရင် အမျိုးသမီးငယ်ရဲ့ အမှုနဲ့ ပတ်သက်ပြီးတော့လည်း တဖြည်းဖြည်း ပျောက်ကွယ်သွားမှာကို စိုးရိမ်တယ် လို့ ပြောပါတယ်။

 “ မြန်မာတွေ ပြဿနာ တက်လို့ ရှေ့နေတွေ ငှားပေးတယ်၊ မြန်မာတွေဘက်က လိုက်ပေးတယ်၊ နောက်ဆုံး ကျလို့ ရှိရင် မြန်မာတွေပဲ အမှု ရှုံးတယ်။

 ရှုံးတယ် ဆိုတာက တရားသူကြီးက ထိုင်းလူမျိုး အလုပ်ရှင် ကလည်း ထိုင်းလူမျိုး၊ အလုပ်ရှင်က ပြစ်မှုကျူးလွန်ထားတယ်၊

 မြန်မာဖက်က ရပ်တည်ပေးပေမယ့်လဲ နောက်ဆုံး သူ့နိုင်ငံထဲမှာ သူ့ လူမျိုးကိုပဲ ကာကွယ်ပေးသွားတာ ရှိတယ်”

ဘန်ကောက်မြို့မြန်မာသံရုံး အရာရှိကြီးတယောက်အဖြစ် တာဝန်ယူခဲ့ဖူးတဲ့ ဦးနိုင်ထွန်းက ရှင်းပြပါတယ်။

ထိုင်းမီဒီယာများမှာလည်း ဒီဖြစ်ရပ်ကို အဆက်မပြတ် ဖော်ပြခဲ့ကြပါတယ်။

ကလေးရဲ့ ဘယ်ဘက်လက် လှုပ်ရှားလို့ မရဘူးလို့ ထိုင်းသတင်းတွေမှာ ရေးထားပါတယ်။

 သန်းထိုက်ဦး ~

http://blog.irrawaddy.org/2013/02/blog-post_2293.html