အချိန်ပိုင်း လျှပ်စစ်မီးကြောင့် ရန်ကုန်လူထု စိတ်ပျက်

ရွေးကောက်ပွဲ ကျင်းပ အပြီး စတင်သည့် အလှည့်ကျ မီးပေးစနစ်ကြောင့် ရန်ကုန်မြို့ လူထုမှာ စိတ်ပိုင်းဆိုင်ရာ မပျော်ရွှင်မှုများနှင့် စတင် ကြုံတွေ့နေ ရပြီး လုပ်ငန်း များ တွင်လည်း ကုန်ကျစရိတ် တိုးလာနိုင်ကြောင်း မြို့ခံတို့က ပြောဆိုကြသည်။

“မီးပြတ်တာကတော့ ရွေး ကောက်ပွဲနဲ့ မဆိုင်ဘူးထင်တယ်။ အုပ်ချုပ်မှုယန္တရား ညံ့တယ်လို့ပဲ ထင်တယ်။ ရာသီဥတုပူပြင်းတဲ့ ဒဏ်ကို ခံနေရတဲ့အချိန်မှာ အိမ်ပြန်လာတော့ မီးကမလာတော့ စိတ်ညစ်စရာတွေဖြစ်ပြီး မပျော်နိုင်ဘူး။ အလုပ်မှာလည်း ကုန်ကျစရိတ်တွေ တက်လာတာပေါ့”ဟုပုဂလိကဆေးရုံတွင် တာဝန်ထမ်းဆောင်နေ သော ဒေါက်တာကျော် စွာဦးက ပြောသည်။ထို့အတူ ပဲခွဲစက်လုပ်ငန်းတွင် ဒါရိုက်တာတာဝန် ထမ်းဆောင်နေသူ ဦးသိန်းဝင်းကလည်း “မီးမလာတဲ့အတွက် အလုပ်လုပ်လို့မရဘူး။ မီးစက်သုံးရတဲ့အတွက် ဆီဖိုးပိုကုန်မယ်။ ကုန်ဈေးနှုန်းကတော့ လျှပ်စစ်တစ်ခုတည်းနဲ့ မဆိုင်ပါဘူး”ဟု မှတ်ချက်ပြုသည်။

ရန်ကုန်မြို့တွင် မီးပေးဝေမှုအား ဧပြီလ ၂ ရက်မှစ၍ A, B, C အုပ်စု သုံးခုခွဲကာ နံနက် ၅ နာရီမှ၁၁ နာရီ ထိတစ်ကြိမ်၊ နေ့ လယ် ၁၁ နာရီမှ ညနေ ၅ နာရီထိ တစ်ကြိမ်၊ ညနေ ၅ နာရီမှ ည ၁၁နာရီထိ တစ်ကြိမ်၊ည ၁၁ နာရီမှ နံနက် ၅ နာရီထိတစ်ကြိမ်ဖြင့် အလှည့်ကျ မီးပေးသွားမည်ဟု ရန်ကုန်မြို့တော် လျှပ်စစ်ဓာတ် အားပေးရေး အဖွဲ့မှ ထုတ်ပြန်ခဲ့သည်။ “နိုင်ငံခြားသားတွေ အခုလို အများကြီး ရောက်နေတဲ့အချိန် မှာ မီးပြတ်တာ သိက္ခာကျစရာပဲ။ ဆည်တွေလည်း အသစ်ဆောက်ထားရဲ့သားနဲ့ မီးပြတ်တာ မကောင်းဘူး”ဟု ဒို့မိုးယံမော်တော်ယာဉ်အရောင်းစင်တာ ဖွင့်လှစ်လုပ်ကိုင်သူ ဦးကျော်ထင်ကျော်က ဆိုသည်။

ယခုကဲ့သို့ အုပ်စုခွဲ၍ မီးပေးရခြင်းမှာ လျှပ်စစ်သုံးစွဲမှုပမာဏ မြင့်တက်လာပြီး ထုတ်လုပ်မှုအပိုင်းတွင် တိုး၍မထုတ်လုပ်နိုင်ခြင်း ကြောင့် ဓာတ်အား လိုအပ်ချက်မြင့်မားနေ သဖြင့် အလှည့်ကျစနစ် အားဆောင်ရွက်ရခြင်းဖြစ်ကြောင်းရန်ကုန်မြို့တော်လျှပ်စစ်ဓာတ် အားပေးအဖွဲ့မှ ဒုဥက္ကဋ္ဌ ဦးမောင်မောင်လတ်ကပြောသည်။ သို့သော် အရေးကြီးနေရာ ဟု သတ်မှတ်ထားသော H အုပ်စု နေရာများဖြစ်သည့် လုံခြုံရေးဆိုင် ရာနေရာများ၊ ဆေးရုံများ၊ ဘဏ် များ၊ ဆက်သွယ်ရေး၊ လေဆိပ်၊ သံရုံးနှင့် စီအင်န်ဂျီ ဓာတ်ငွေ့ပေး ဝေရာ နေရာများတွင်မူ မီးအပြည့် ပေးသွားမည်ဟု အဆိုပါတာဝန် ရှိသူကပြောသည်။

ယခုနှစ် အလှည့်ကျ မီးပေး သောစနစ် စတင်သောအချိန် သည် နိုင်ငံတော်တွင် မြန်မာကျပ် ငွေနှင့် အမေရိကန်ဒေါ်လာလဲလှယ်နှုန်းပြင်ဆင်မည့်အချိန်နှင့် တိုက်ဆိုင်နေသဖြင့် ထိုကဲ့သို့ငွေလဲနှုန်းပြောင်းလဲမှုကြောင့် အခွန်ကောက်ခံမှုတိုးလာနိုင်ရာ ဒီဇယ်ဆီဈေးနှုန်းမှာ လည်းလက် ကျန်ကုန် ပြီးနောက် ဈေးတက် လာနိုင် ကြောင်း သုံးသပ်ကြသည်။ ပြီးခဲ့သည့်နွေက လျှပ်စစ်မီး အပြည့်ရရှိခဲ့ခြင်းကြောင့် အများပြည်သူ စိတ်ချမ်း သာခဲ့ရပြီး၊ နောက်နှစ် များတွင်လည်း လျှပ်စစ်မီးအပြည့်ပေးလိမ့်မည်ဟု မျှော်လင့်ခဲ့ကြသည်။ 

http://www.yoyarlay.com